किसानां के मुआवजे का मुद्दा गर्मावैगा इलैक्सणां म्हैं

मीनू शर्मा: मौसम की मार तै खराब होई फसलां के मुआवजा ना मिलण तै किसान घणे ताप म्हैं सैं अर यू मुद्दा इलैक्सणां म्हैं घणा बडा हौंदा जावैगा। न्यू बी किसान हर बार की वोटां म्हैं मुद्दा बणै ई करै पर इबकी बार तो मुआवजा की बात पै पैंच फंस सकै सैं। प्रदेस सरकार नै तो दावे करै थे कै फसलां के मुआवजे की राशि किसानां के सीधे खाते म्हैं आवैगी पर इब्ब तक तो सब वादे ई लाग रह्ये सैं। किसानां नै बैंकां के चक्कर काटणे पड रह्ये सैं। कुस जगहां तो किसानां नै धरणा बी दिया सै अर वोटां दौरे देख इसका फैदा दूजियां पाॢटयां आले बी ठा सकै सैं।

किसानां के नाम पै पहल्यां बी वोटां मांगी जावैं इब्ब बी इनकै नाम पै राजनीति होवैगी अर वोटां ली जावैंगी। बात तो न्यू सै कै इनकी कोण सुणैगा अर कद नै सुणैगा। कदे तो मौसम की मार इन्नैं मार देवै अर कदे प्रदेस सरकार के वादे। किसान तो चुनावी मौसम के वायदे नै सुण कै मन बलो लेवै अर ओर करै बी के। इब्ब देखण की बात यू सै कै किसानां का यू मुद्दा कुण सी पार्टी ठावैगी।