इसी हफ्ते म्हैं सारी पाॢटयां नै ऐलान करणा पडैगा उम्मीदवारां का

नामांकन भरण की तारीख आ ली सै पर इब्बी बी सारी पाॢटयां नै अपणे उम्मीदवारां का ऐलान कोणी करया सै। हरी पगड़ी आले अर हाथ आलेआं की पार्टी चार सीटां पै पैंच फंसा के बैठी सैं। चए कितणा बी लेट क्यूं न कर लेवैं इन्नैं इसी हफ्ते म्हैं अपणे उम्मीदवार तारणे पडैंगे। भतीजे की पार्टी तो इब्बी सारेआं के उम्मीदवारां नै देखण लाग रह्यी सै। इस खातर यू सबतै बाद म्हैं अपणे उम्मीदवारां का बतावैंगे। दिल्ली आली पार्टी नै तो भतीजे की पार्टी गेल गठजोड़ कर ठीक ई करया सै। दूसरे चरण का मतदान बी हो लिया सै तो इब्ब सारी पाॢटयां का ध्यान प्रदेश म्हैं ई रवैगा तो एक-दो दिन म्हैं चुनावी रण की तस्वीर स्यामणे आ ई जावैगी। इस बात म्हैं कोई शक कोणी कै इस बार मुकाबला घणा करड़ा हो ग्या सै। भगवांधारियां नै छोड़ कै सारी पाॢटयां एक-दूजे के उम्मीदवारां की बाट जोवै सैं। भगवांधारियां नै तो इलैक्सण का चाव बी घणा सै। बाकी इब्ब टेम बतावैगा कै यू चाव बणया रवैगा कै नी।
-(प्रस्तुति: मीनू शर्मा)