बिना प्लांनिंग करी थी खिलाड़ी सम्मान समारोह की घोषणा, दूजी बार होया कैंसल
punjabkesari.in Monday, Jun 24, 2019 - 09:54 AM (IST)
मीनू शर्मा: परदेस सरकार इब्ब जितनी बी पहले की घोषणा कर चुकी सै उनने इब्ब पूरा करन म्हे लागरी सै। विधानसभा इलैक्शन म्हे थोड़ा टेम रह गया सै अर यों अपने कहे पै खरा उतरना चावै सै। पर जद बात की जावे सरकार के खेल मंत्रालय की तो यों तो बार बार अपने कहे तै मुकर जावे सै। इस साल फेर तैं ईनाम के पिसे देन खातर राख्या प्रोग्राम दूजी बार रद्द करना पड़ रया सै। चाए इस खातर तो न्यू कहा जा रहा सै कै खिलाड़ी घने सै अर एक दिन म्हे उन तै ईनामी राशि कोन्या दी जा सके सै।
इस करके उनके ईनाम के पिसे उनके खाते म्हे गेर देवेंगे। जद न्यू ई करना था तो प्रोग्राम की डेट क्यों घोषित करीथी। दूजी बार इस तरै प्रोग्राम रद्द करन तै सरकार की किरकिरी होन आली बात सै। न्यू लाग्गे मन्त्री जी नै बिना किसे प्लाङ्क्षनग कै इसकी घोषणा करि थी जिस खातर बिना प्लाङ्क्षनग ई इसनै रद्द करना पड़ गया। खिलाडिय़ां के ईनामी राशि के नब्बे करोड़ देने सै। सरकार इब्ब उनके बैंक खातेया म्हे सीधा ट्रांसफ र करेगी बात तो यों बी हो सके थी के इन्ने इसा ही पिसे देने थे तो जड़े किसे खिलाड़ी खातर घोषणा करी थी तब्बे इनतै इनका पिसा गेल ई दे देना चहिए था।
दूजी पार्टियां आले नै बी मुद्दा मिल गया बैठे बिठाये अर वा इनने इसपै घेरेंगे बी जरूर। इब्ब खेल मंत्री इस बात नै जिस तरै मर्जी लपेट लेवें पर खिलाड़ी सम्मान प्रोग्राम रद्द करना इनकी बिना प्लाङ्क्षनग करे की गयी घोषणा ही थी। इस तै उन म्हे या ई संदेश जावेगा के सरकार नै ईनाम के पिसे तो दे देवे पर इनका सम्मान कोन्या कर सके सै। बाकि तो टेम बताया करें के सरकार के इन फैसलेया का के असर पड़ेगा।