खट्टर साहब के बाद इब्ब दूजे मंत्री की फर्जी वीडियो

चंडीगढ़(मीनू): थोड़े दिन पहल्यां मुख्यमंत्री खट्टर साहिब की फर्जी खबर सोशल मीडिया पै पोस्ट करण का घणा बवाल काटया था इब्बी उस बात का ताप ठंडा बी नई होया था के भगवाधारियां के एक ओर मंत्री की फर्जी मारपीट की वीडियो आ गया सै। इस म्है धौले कपड़ेआ  आलै एक आदमी की कुछ लोग कुटाई कर रहे सैं अर कुछ  लोग उसनै छुड़वा रैह सैं। इस वीडियो के पाच्छै बी दिल्ली आली पार्टी के कार्यकर्तावां का हाथ सुनन म्हैं आया सैं।

दिल्ली आली पार्टी के कार्यकत्र्ता का नाम आया सैं के उसनै यू वीडियो वायरल किया है। वीडियो वायरल होंदे  ई लोग्गां म्है चर्चा होण लाग गई अर मंत्री के समर्थकां जमा ताप म्हैं आ गए। अर दिल्ली आली पार्टी के कार्यकर्ता की गिरफ्तारी की मांग करण  लाग्गै  न्यू तो पुलिस नै उस कार्यकत्र्ता नै पकड़लिया अर उसका कहणा सैं के उसनै गलती तै यू वीडियो पोस्ट कर दी सैं। इस म्हैं दिखण आला आदमी मंत्री कोणी सैं। अर न ई उसनै उसतै जुडय़ा होया सैं। दूजियां पार्टियां नैं बी दिल्ली आली पार्टी के कार्यकर्तावां की इस हरकत पै नाराजगी जताई सैं। खट्टर साहब के फर्जी खबर पोस्ट करण के मामले म्हैं बी प्रदेस सरकार के इनकी पार्टी के 60 वर्करां नै अंदर करया सैं।