छोरेयां पाच्छै इब्बै बाब्बू नै बी काढ दिया पार्टी सै
11/15/2018 11:17:09 AM
चंडीगढ़(मीनू): ल्यो जी जिस बात का डर था वा ई हो ली सै। घर की फूट नै इब्बै नया रूप ई ले लिया सै। हरी पगड़ी आलेयां नै छोरेयां पाच्छै इब्बै बाब्बू नै बी पार्टी तै बाहर काढ दिया सै। इब्ब दोनूं छोरेयां अर बाब्बू तीनों नै पार्टी से काढ दिया ग्या सै। इनकी पार्टी ने इसका कारण 17 नवम्बर की रैली बताया सै अर रैली करम तै पार्टी की अनुशासनहीनता बताया सै। इस तरैं तो न्यू लाग्गै इनकी सुलह होण के सारे किवाड़ बंद हो ग्यै सै।
चौधर की लड़ाई घर तै लिकड़ कै इब्ब खुल कै बाहर आ ग्यी सै। चाचे-भतीजे की चौधर की जंग म्हैं रब्ब भाई-भाी बी अलग हो ग्यै सै। बड़े भाई के पार्टी तै निष्कासण तै प्रदेश की राजनीति अर हरी पगड़ी आलेयां की अपणी पार्टी पै बी पूरा असर पडैगा। इनकी पार्टी के समर्थक तो पहल्यां ई दोफाड़ होए पडे सैं। इब्ब तो टेम बतावैगा कै इनका अ इनकी पार्टी का कै बणैगा। घर की फूट अर पार्टी की टूट प्रदेस की राजनीति म्हैं इन्नै कहां पहुंचावैंगी।