हरी पगड़ी आले बी कर रह्ये सै पक्की जमीन की तलाश

मीनू शर्मा: हरी पगड़ी आलेआं का बाब्बा फरलो पै आया सै अर आंदे ई यू पार्टी मजबूत करण म्हैं लाग ग्या सै। एकला चलण म्हैं नुक्सान हो ज्यागा। इसका इन्नैं बेरा बी सै। तो बाब्बा इब्ब नए विकल्पां की तलाश म्हैं लाग्या पडया सै। बाब्बा इब्ब नए राजनीतिक समझौते करण की बात बी कर रह्यै सै। इब्ब यू जडै बी जावैअर लोग्गां नै मिल्लै तो कवै कै कोई भी पार्टी इनकी खातर अछूत कोणी सै। इसका सीधा मतलब सै कै इसनै इब्ब बेरा सै के घर की फूट तै पार्टी कमजोर हो ग्यी सै।

अर बिना किसी के साथ के इनकी जड़ें और कमजोर हो ज्यांगी, तब्बै तो इब्ब इन्नैं सारे विकल्प खोल दिए सै। प्रदेस का सियासी पारा पहल्यां तै ई चढया पडया सै। तो हरी पगड़ी आलेआं नै बी टेम रहंदेयां किसी गेल आणा ई पडैगा। दिल्ली आलेआं नै तो भतीजेआं की पार्टी का साथ ले लिया सै। हाथी आले आटो गेल हो ग्ये सैं तो इब्ब बची सै भगवांधारी, भगवांधारियां का नीली पगड़ी आलेआं की पार्टी गेल पंजाब म्हैं गठजोड़ सै। कदे पुराणे साथी हरी पगड़ी आले बी होया करैं थे, तो इब्ब देखण आली बात होवैगी कै हरी पगड़ी आले भगवांधारियां दौरे कद अर क्युंकर जावैंगे। कदे कोई नवां तीसरा मोर्चा तो न बणैगा, व तो टेम बतावैगा।