इब सुसराड़ का माल खाण आल्यां पै भी कसैगा खट्टर का शिकंजा

चंडीगढ़(मीनू शर्मा): खट्टर बाब्बे नैं इस्सा कसूत्ता काम कर दिया सै अक सरकार के नौकरां कै पसीनां सा छूटण लाग्ग ग्या सै। सरकार नैं साफ कर दिया सै अक सुसराड़ तैं माल ल्याण आले या उड़ै की संपत्ति लेण आले कर्मचारियां उसका पूरा लेखा-जोखा देणा होगा। सरकार के इस फरमान तैं वे कर्मचारी कसूत्ते हिरान होण लागगे सैं जिणनैं सुसराड़ का माल खाण की कसूत्ती आदत्त पड़ रह्यी सै। कई सरकारी नौकर तैं सुसराड़ मैं घर जमाई बणे बैठे सैं। वे साला ना होण का पूरा फैदा ठाह रह्ये सैं। सुसराड़ का सारा धन और सारी दौलत उन्हें कै धोरै सै।

बड्डी बात तो यो सै सुसराड़ की दौलत पाएं पाच्छे वे उसपै टैक्स देण तैं भी आसानी तैं बच ज्यां सैं। इसतैं टैक्स की चोरी नैं भी बढ़ावा मिलै सै अर सरकार नैं भी नुकसान ए उठाणा पड़ै सै। इब खट्टर बाब्बे नैं इस्से फोकअ का माल खाण आल्यां की चूड़ी जम्मा करड़ी कर दी सैं। बोल दिया सै अक जो भी माल सुसराड़ का खा रह्ये सो उसके बारे मैं साफ-साफ बता द्यो। भाई बतावैं सै अक सरकार इब इस्से कर्मचारियां तैं पहल्यां सुसराड़ के माल का लेखा-जोखा लेगी अर पाच्छै उसपै जिस्सा बणैगा उसा टैक्स भी वसूल करैगी, छोडै़ कोनी।