इब्ब कौन-सी पगड़ी बांधैंगे बाब्बै कै पोते

चंडीगढ़(मीनू):  ल्यो जी वा बात तो हो ली जिसका सब्बै नै अंदेसा पहल्यां तै ई था, हरी पगड़ी आलेयां के बड़े नेता नै अपणे दोनूं पोतेआं नै पार्टी तै बाहर का रास्ता दिखा दिया सै। इसतै पूरे प्रदेस की राजनीति म्हैं तूफान-सा आ ग्या सै। रात-रात म्हैं ई हरी पगड़ी आलेआं की फूट की खबरां स्यामणे आण लाग ग्यी थीं। कल नै पोतेआं का बाब्बू बी छुट्टी पै जेल तै बाहर आ रह्या सै। लोग्गां का पूरा ध्याण इस ओड ई लाग्या सै कै इनका आग्गै कै बणेगा। दूजियां पार्टियां आले बी इन दोनू पोतेआं काणी देख रहे सै कै यू किस ओर अपणा रुख करैंगे। बाब्बै कै इस फैसले पै पोतेआं कै समर्थकां म्हैं घणा ताप चढया सै। पार्टी तै काढण की खबर आंदे ई पोतेआं के कुछ समर्थक नै पार्टी तै इस्तीफा बी दे दिया सै। 

कुछ बी कह ल्यो ताऊ कै परिवार की अंदरूनी फूट कोई घणी आच्छी बात कोणी सै। इब्बे तो यू देखण आली बात सै कै अपणे बाब्बू कै बाहर आण पै यू अपणी पार्टी बणावैंगे अर किसी ओर पगड़ी आले गेल पगड़ी बांध कै बैठैंगे। बाकी टेम बतावैगा कै इनके बाब्बे की पार्टी का रुख बी किस ओड होवैगा अर पार्टी के बीच समर्थकां की दरार नै किम्मै पाटैंगे।