चाचे-भतीजेआं म्हैं जुबानी जंग हो रह्यी सै तेज

चंडीगढ़(मीनू): हरी पगड़ी आले चाचे अर न्यारी पार्टी बणान आले भतीजेआं म्हैं जुबानीजंग खत्म होण का नाम कोणी लेवै सै। एक तो हरी पगड़ी आलेआं के विधायक इन्नैं छोड़ भतीजे गेल जा रह्ये सै। अर चाचा इब्ब न्यू कवै कै बडे भाई नै पहल्यां के इलैक्सणां म्हैं टिकट बेची सैं। यू सुण कै भतीजे बी कडै पाच्छै रवैं थे, इन्नैं बी चाचे का अपणे बडे भाई पै टिकट बेचण का दोष लगा कै भूचाल ल्या दिया सै।

इसनै अपणे बडे भाई पै इल्जाम तो लगा दिया पर इब्ब इन बातां नै करकै यू अपणी पार्टी की साख ई खराब कर रह्यै सै। चाचे नै तो कह दिया कै भतीजे के बाब्बू नै छोटे खातर सौदेबाजी कर ली सै पर पार्टी म्हैं यू बी या तब्बै बोल्या। इब चाचे की इस बात तै प्रदेस की राजनीति गर्म हो ली सै। भतीजे नै बी इब्ब जमकै भडास काडी सै। इब्ब आण आले दिनां म्हैं यू जुबानी जंग किस ओड रुख करैगी यू तो टे ई बतावैगा।