जाड्डे म्हैं तप रही सै जींद की राजनीति
1/13/2019 12:27:45 PM
चंडीगढ़(मीनू): जींद उपचुनाव 28 जनवरी नै होणा सै। सारेआं पार्टी के उम्मीदवारां नै नाम के पर्चे भर दिए सै अर सारे ई अपणी-अपणी जीत के दावै कर रह्ये सै। जींद की धरती नै इसतै पहल्यां ई बडे-बडे राजनीतिक सूरमा विधानसभा तक पहुंचाए सै। इब्ब बी यू धरती इसी तरज पै किसी और विधायक नै उसकी मंजिल दिवावैगी। वोटां म्हैं तो प्रचार का रौला होया ई करै पर इस बार मुकाबले म्हैं सारे ई खागड़ नेता सै कोई सालां तै पार्टी गेल जुडया सै अर कोई अपणी ताकत दिखाण नै जुटया सै।
हाथ आलेयां नै तो अपणे कद्दावर नेता नै वोटां म्हैं खडे करकै इस उपचुनाव नै नाक का सवाल बणा लिया सै। न्यू तो सत्ताधारियां आस्ते बी यू उपचुनाव परीक्षा ई सै क्यूंकि निगम चुनावों म्हैं तो शहरी वोटर थे, अर इस चुनाव म्हैं तो शहरी अर गाम दोनूआं के वोटर होवैंगे। यू उपचुनाव सारीआं पाॢटयां खातर रण का मैदान ई बण ग्या सै। कुण सी पार्टी गेल कितणे लोग्गां का साथ सै यू तो टेम बतावैगा पर मुकाबला तो इस बार कटड़ा अर मजेदार हो ग्या सै।