बज ग्यी रणभेरी, जींद उप चुनाव 28 को
punjabkesari.in Wednesday, Jan 02, 2019 - 02:50 PM (IST)
चंडीगढ़(ब्यूरो): ल्यो जी इब्ब चुनाव आयोग नै जींद उपचुनाव की तारीख का ऐलान कर दिया सै। यू चुनाव 28 जनवरी नै होवैगा। एक बार फेर तै चुनावी रणभेरी बाजैगी। फेर तै सारी पाॢटयां अपणी ताकत का दम दिखावैंगी। यू सीट पगड़ी आलेआं की थी। इनके विधायक के स्वर्ग सिधारण पाच्छै यू सीट खाली हो ग्यी थी। दूजियां पाॢटयां आले तो प्रदेस सरकार पै जींद उपचुनाव जानकै लेट कराम का दोस बी लगावैं थी। बडे पहल्यां तै ई दूजी राजनीतिक पाॢटयां इस चुनाव नै कराए जाए की मांग करै थीं। प्रदेस सरकार का इब्ब निगम चुनावां के बाद यू उपचुनाव म्हैं जीत बरकरार राखणा मूंछ का सवाल सै। निगम चुनावां म्हैं पांचां जिलेआं म्हैं जीतण पाच्छै भगवांधारियां के हौंसले बुलंद सैं।
सारी पाॢटयां आले इस चुनाव नै लेकै बडे चाव म्है सै। सबनै लाग्गै के उनकी पार्टी का उम्मीदवार ई यू सीट काढ के लै जावैगा अर प्रदेस सरकार नै हार मिलैगी। प्रदेस सरकार तो अपणे ई तान म्हैं सै कै विपक्ष तो पांचां खान्ने चित्त सै। निगम चुनावां के बाद यू चुनाव बी सत्ताधारी पार्टी ई जीतैगी तो इब्ब इस चुनाव के नतीजे बता देवैंगे कै कुण सा जीतैगा अर कुण सा हारैगा। तब्बै तक तो सारी पाॢटयां आलेआं के नेतावां के वादे तो सुण सकै सैं कै कुण सा लोग्गां नै किम्मै बलौवैगा।
सबसे ज्यादा पढ़े गए
