इब खट्टर बाबा नैं भी कसूता कस लिया सै इलैक्शनां का लंगोट

चंडीगढ़:  भाई इलैक्शनां का टेम आंदे ही कोए साइकिल चला रह्या सै तें कोए रथ पै घूम कै लोग्गां धोरै जा रह्या सै। एक नैं जेल भरण का ठेका ठा राक्ख्या सै। इब भगवांधारियां नैं भी इलैक्शनां धोरै आकै लंगोट कसकै लोग्गां कै बीच जाण का काम शुरू कर दिया सै। माड़े दिनां पहल्यां ए इणका मोटा बाबा सूरजकुंड मैं आया था। उड़ै उसनैं हरियाणे आले भगवांधारियां तैं कड़े बोल बोलकै कह दिया के मौका पड्या सै इब्बै तैं करड़े होकै लाग्गोगे जद्दे थारा आगले चुनावां मैं सूत सा बैठैगा। 

बस उसका इतणा कहणा था अर खट्टर बाबा नैं भी ताण दिए अपणे सारे वजीर। उणतैं बोल दिया के लोग्गा धोरै जाकै उणनैं बताओ के चौधर हाथ मैं आयां पाच्छै के काम सरकार नैं करैं सैं। अपणी चौधर का जमकै ढिंढौरा पीटो। कलमकारां की मदद तैं हफते मैं दो बार लोग्गां तईं अपणी सरकार की नीतियां नैं पहुंचाओ। बड्डे अफसरां तैं भी बोल दिया सै के वे भी इस काम मैं हाथ धौ कै लाग जाओ। लोग्गां नैं बताओ के इस सरकार नैं पूरी ईमानदारी तैं अपणा काम करा सै अर आग्गै भी करती रवैगी। इब देखणा यो सै भाई अक ढिंढौरा पीटण का किस्सा नतीजा सामणै आवैगा।