इब्ब भतीजे आली पार्टी बणावैगी दिल्ली आली पार्टी गेल तालमेल

हाथ आलेआं नै तो दिल्ली आली पार्टी गेल जाण की बात तै कोरा जवाब दे दिया सै कि यू किसी गेल समझौता कोणी करैंगे। तो इब्ब दिल्ली आली पार्टी अर भतीजेआं की पार्टी म्हैं बातचीत चाल रह्यी सै। जींद उपचुनाव म्हैं बी इन्नै भतीजेआं तै समर्थन दे दिया था तो जदै इनकी आपस म्हैं बात बण बी जावै तो कोई न्यारी बात कोणी सै। एक बात तो यू बी सै कै दिल्ली आली पार्टी इब्बी प्रदेस म्हैं एकला चालण जितणा दम कोणी राखै तो इन्नै तो किसी न किसी पार्टी का आसरा चइए। भतीजेआं की पार्टी गेल चाए इनके समर्थक सैं अर हरी पगड़ी आलेआं के नेता बी इनके गेल आ ग्ये सैं फेर बी पूरी सीटां पै एकला चालण की स्थिति म्हैं यू बी कोणी सै। पहल्यां तो चाचे-भतीजे दोनूं साथ थे तब्बै तो यू सारी सीटां पै अपणे उम्मीदवार खडे कर सकै थे पर इब्ब बिना किसी गेल जोड़-तोड़ करै इनकी बात कोणी बण सकै सै। थोडे दिनां म्हैं तो बेरा पाटैगा कै यू किस गेल जावैंगे।
     -(प्रस्तुति: मीनू शर्मा)