खट्टर बाब्बै की कैबिनेट म्हैं ‘मनोहरी’ फैसले

चंडीगढ़(मीनू): प्रदेस सरकार नै लोकसभा के इलैक्सणां तै पहल्यां ‘मनोहारी’ फैसले किए सै। कैबिनेट की बैठक म्हैं इन्नै कोशिश करी सै कै प्रदेस के सारे लोग्गां खातर कुस न कुस दे दिया जावै। प्रदेस सरकार नै इब्ब जनरल वर्ग के गरीबां नै दस प्रतिशत आरक्षण देण का फैसला लिया सै। यू आरक्षण ए तै लेकै डी श्रेणी की सरकारी नौकरियां अर एडिड संस्थानां म्हैं दाखिले खातर लागू होवैगा। प्रदेस के जवानां खातर यूथ पालिसी बी बणाई ग्यी सै।

खेल विश्वविद्यालय बणान की बात बी करी ग्यी सै। कुल मिलाकै यू सारे आण आली वोटां नै ध्याण म्हैं राख कै ई किए ग्ये सैं। भगवांधारी यू बात घणी आच्छी तरैं जाणै सै कै इस टेम पै किए वायदे अर फैसले वोटां खैंचण म्हैं काम आवैंगे।  भगवांधारियां की पूरी कोसिस रवैगी कै केंद्र सरकार की कुछ दिनां पहल्यां किसान पैंशण आले फैसले नै प्रदेश म्हैं पूरी तरह अमल म्हैं ल्याया जावै। वोटां म्हैं किसानां का मुद्दा हर वोटां म्हैं उठाया जावै, न्यू लाग्गै इन्नैं इलैक्सणां खातर अपनी कमर कस ली सै।