पुरानी पिंशन बहाली खातर प्रदर्शन करैंगे अद्र्ध सैन्य बलां के जवान

चंडीगढ़(मीनू): सारे प्रदेसां की अखिल भारतीय राज्य सरकारी कर्मचारी फैडरेशन गेल अद्र्ध सैन्य बलां के जवान अर दूजे कर्मचारियां खातर पुरानी पिंशन स्कीम बहाली की मांग नै लेकै कल संसद तक कूच करैंगे। उसतै पहल्यां वा पुलवामा के शहीद जवानां नै श्रद्धांजलि बी देवैंगे। इनकी फैडरेशन आलेआं का कहणा सै कै रिटायरमैंट पै अद्र्ध-सैन्य बलों के जवानां अर कर्मचारियां नै पुरानी पिंशन स्कीम आली पिंशन कोणी मिलैगी तो इन्न जवानां खातर यू संसद तक कूच कर रह्यै सैं।

सरहद पै सेना के जवानां गेल अद्र्ध-सैनिक बलां के जवान बी होवैं सैं तो दोनूआं नै एक ई तरैं के पिंशन लाभ मिलणे चइए। प्रदेस म्हैं एनएचएम कर्मचारी पहल्यां तै ई हड़ताल पै सै जिसतै आम लोग्गां नै परेशानी ठाणी पड रह्यी सै। इसा नी सै कै यू हड़ताल पहली बार हुई सै पर इस बार यू लम्बी खींचती जा रह्यी सै। प्रदेस सरकार कर्मचारियां  नै अल्टीमेटम दे रह्यी सै अर वा हड़ताल जारी राख रह्ये सै। सरकार नै टेम रैंदे इनकी बात सुण लेणी चइए। वोटर म्हैं बी टेम इब्ब थोडा ई रह ग्या सै।