फेर तै बागी तेवर दिखा रह्यै सै भगवांधारियां के अपणे ई नेता

चंडीगढ़(मीनू): प्रदेस म्हैं सीत लहर चाल रह्यी सै। घणा कोहरा पड रह्या सै पर प्रदेस की राजनीति म्हैं ठंड का असर कोणी दिख रह्यै सै। राजनीति तो सारी पाॢटयां आलेआं की गर्माई होई सै। हरी पगड़ी आले चाचे की न्यारी  पार्टी बनाण आले भतीजेआं गेल जुबानी जंग रोजै ई तीखी होंदी जावै सै। हाथ आले बी बीच-बीच म्हैं अपणी जुबानी गोल दाग देवैं अर भगवांधारियां के अपणे बागी नेता फेर तै सुरू हो ग्ये सै।

इनके एक बागी सांसद नै तो पानीपत म्हैं रैली काढ नई पार्टी बणा ली थी अर इब्ब फेर तै एक समेत चार विधायकां नै अपणे ई सरकार के मुख्यमंत्री कै खिलाफ मुंह खोल्या सै। न्यू तो इलैक्सणां म्हैं इतणी ऊठा-पटक तो सारी पार्टियां म्हैं होया ई करै पर भगवांधारियां खातर यू बात घणी आच्छी कोणी सै। कडै तो यू लोग्गां म्हैं अपणी मजबूत पकड़ की बात कर रह्यै सै अर अपणे घर नै सांभ कोणी रह्यै सै। इसतै पहल्यां बी इनके एक बडे मंत्री नै एक सभा म्हैं मुख्यमंत्री खातर अपणे बगावती तेवर दिखा राक्खै सैं। इब्ब यू मंत्री समेत चार विधायक मुख्यमंत्री के खिलाफ अपणी भड़ास काढ रह्यै सै बाकी टेम बतावैगा यू कै चावै अर मान्नैंगे कै यू बी पार्टी नै छोडैंगे।