‘आया राम गया राम’ का खेल नया कोणी सै प्रदेस की राजनीति म्हैं

मीनू शर्मा: कह्या जावै कै राजनीति म्हैं कुस बी संभव कोणी सै। अर हरियाणा की राजनीति म्हैं ‘आया राम गया राम’ का खेल बडा पुराणा चाल रह्या सै। वोटां म्हैं बडे नेता अपणी पार्टी छोड कै दूसरी म्हैं जावै सै रोजै ई कोई न कोई नेता किसी दूजी पार्टी नै समर्थण देंदा जावैगा। इन म्हैं कुस नेता तो वा होवैं जिन्नै बेरा होवै सै कै इनका अपणा वजूद तो इतणा बडा कोणी सै हो सकै दूजी पार्टी के वजूद तै इनका कुस भला हो ज्यां। कुस नेता वा बी होवैं जिन्नै उनकी पार्टी म्हैं बणदा सम्मान न मिलया होवै। दोनूआं हालतां म्हैं दल-बदल कार्यक्रम सुरू हो ज्या करै। अर उस गेल सुरू हो ज्या करै वोटां टूट्टण अर बंटण का खेल। इब्ब वोटर बी पहल्यां तै घणा स्याणा हो लिया सै। वा बी सबकी सुणै पर करै अपणे मन की। बाकी रही बात दल-बदलूआं की वा तो इस प्रदेस म्हैं लालां जिसे बडे नेतावां के टेम म्हैं बी होया करै था इब्ब बी हो रह्यै सै अर आग्गै बी होंदा ई रहैगा।