विधानसभा म्हैं बी दिखी भगवांधारियां पै जीत की खुमारी

चंडीगढ़(मीनू): विधानसभा के शीतकालीन सत्र म्हैं होए हल्ले का तो सबनै बेरा सै। इब ओढै कुछ दिलचस्प बातां बी देखण न मिलै सै। सत्र म्हैं मुख्यमंत्री साहब के सिर पै निगम चुनावां की जीत की खुमारी साफ झलकै थी। आंदेओई मुख्यमंत्री साहब नै डायलाग बी चेप दिया था कै विपक्ष चारों खाने नी पांचों खाने चित्त होआ सै। साहब तो मड़क म्हैं यू बी बोल ग्ये कै निगम चुनावां म्हैं सारे दल इकट्ठे हो ग्ये थे पर लोग्गां नै इन्नैं दलदल कर दिया।

विपक्ष म्हैं जदे किसी नै टूटी सड़कां की बात करी तो साहब बोले कडी सड़क कोणी टूटी सै। जदे काम न होया होंदा इन्नैं पांचां शहरां म्हैं न जितांदे। जीत की खुमारी चढणी चइए पर इतणी बी न चढ जावै कै इन्नैं लोग्गां की मुश्किलां अर मेन मुद्दे ई न दिखैं। मुख्यमंत्री साहब तो जीत के खुमार म्हैं थे ही, इनके मंत्री बी इसी राग पै डफली बजा रह्ये थे। दूजियां पाॢटयां आलेआं के सारे मुद्देआं पै इन्नैं विपक्ष तै दो-दो हाथ करे सैं अर अपणे प्रस्ताव बी पास करा लिए सैं।