जींद के उपचुनाव म्हैं राजनीति बयानबाजी जोरां पै

मिनू शर्मा: न्यू तो हर इलैक्शन म्हैं ई सारी पार्टियां एक-दूसरे पै आरोप-प्रत्यारोप लगावै सै, जींद म्हैं बी यू कुछ हो रहै सै। सारी पार्टियां अपणे उम्मीदवारां के जीतण के दावे बी कर रही सै अर हर कोई दूजी पार्टी के उम्मीदवार पै कमतर होण की बात बी कर रहै सै। इस बार हाथ आलेआं के उम्मीदवार की घणी चर्चा सै। चर्चा होण का कारण यू बी सै के इस उम्मीदवार का पहल्यां तै ई एम.एल.ए. होणा। दूजियां पार्टियां आले इस बात नै घणा ताव दे रहै सै। उनका कहणा सै के इस उम्मीदवार नै तार कै हाथ आलेआं नै सीट जितण की ख्वाइश म्हैं अपणे बड़े नेता नै दांव पै लगा दिया। हाथ आलेआं का इस बात पै कहणा सै के दूजी पार्टियां आले इस उम्मीदवार तै डर कै इसे बयान दे रहैं सै। बाकी उम्मीदवार तो सारी ई पार्टियां आले नै उतार राक्खें सै इब्ब कुण सा जींद की जनता का मन जीतैगा यू टेम बतावैगा।